Becho peludo

Seguro que non está de máis darlle un repaso ao vocabulario. Como levamos tempo sen poder saír ás verbenas que tanto nos gustan, propóñovos este rosco relacionado co canto, a ver como se vos da!  

Recordas canto aprendimos co vídeo da xornalista Esther Estévez no que nos recordaba como se definían en galego as diferentes falas dos animais?  Aquí tedes unha sopa de letras para ver se estuvéchedes ben atentos e atentas!    >A fala animal

Andaba Isabel II sen moito que facer polo palacio de Buckingham e detívose a explicarnos algo fundamental para a aprendizaxe de linguas. Xa sabedes que ela é todo un emblema para as e os falantes do inglés, non?  Cal cres que será a súa mensaxe?   Atende ao que di a Raíña Isabel Que pensas dos acentos das linguas? Como valorades o feito de que os acentos leven emparellados estigmas positivos e negativos? A que pensades que se debe esa realidade? Le agoras as conclusións dun estudo sobre a percepción da xente máis nova sobre o galego, as súas variedades e acentos e os estigmas a eles vinculados.   Aquí tedes o link    

 Participar na elaboración de produtos artesanais para a súa posterior venda co obxectivo de recoller fondos destinados a ONG require dunha excelente comunicación entre todas e todos os que forman parte do proxecto. Dende a  didáctica das linguas poderiamos propoñer unha sesión na que aprender a verbalizar os sentimentos que poden xurdir dentro dun grupo de persoas que desenvolven un proxecto. Por exemplo, o alumnado aprendería a xestionar o malestar persoal que pode causar o cuestionamento das súas ideas.

 O que máis me interesa dos Entornos Virtuais de Aprendizaxe (EVA) é a posibilidade que brindan para traballar coa comunicación, aspecto que considero fundamental no eido das linguas. Penso que o podcast pode resultar moi útil para o traballo de linguas pola súa versatilidade para abordar valores, relacións humanas, coñecementos... Por exemplo, no caso da rapazada que se incorpora aos centros sen coñecer a lingua, o traballo coa radio preséntase como un entorno lúdico no que perderlle o medo ao idioma e ao mesmo tempo eliminar barreiras co resto do alumnado. Desde o departamento de orientación podería propoñerse unha actividade na que o alumnado estranxeiro elixise unha palabra ou unha expresión do seu idioma significativa, característica ou que bote en falta no seu país de acollida. Os seus compañeiros e compañeiras deben atopar a palabra en español e galego que mellor se axuste ao termo proposto, de maneira que se constrúan pontes entre as dúas culturas. Co resultado destas pequ...

 Na miña experiencia como alumna de linguas non botei en falta o seu uso nun contexto real, seguramente porque na adolescencia descoñecemos partes importantes do que non sabemos. Fun descubrindo as miñas carencias cando empecei a ampliar o círculo persoal. Resultábame incómodo falar en galego pola cantidade de erros que cometía e era incapaz de expresarme en inglés pola vergoña que me producía expoñer o meu nivel pésimo despois de case dez anos de estudo. Penso que a metodoloxía do Amara Berri, na que se empregan  situacións reais na aula coa participación de todo o alumnado e o profesorado, resultan moi útiles para a aprendizaxe de linguas, pois o que propón é sumerxirse nunha realidade na que, no caso das linguas, multiplícanse os inputs e xestiónanse os erros con naturalidade.

O primeiro que imaxino cando penso na fusión de dous grupos de secundaria, de 25 integrantes cada un, é na pandemia. Pero supoño que a distancia de seguridade será historia cando a vacina faga efecto, así que non haberá excusa para non implementar propostas coma esta, na que se eliminan as barreiras entre materias e na que se da un maior protagonismo á socialización. Para min, este último aspecto é dos máis relevantes da experiencia na escola. Cantos grupos de música naceron tras compartir pupitre! Apréndese moito dos demais cando traballamos en grupo e iso vale tanto para o alumnado como para o profesorado, que sempre se queixa da súa soedade na aula e que pode gozar aquí da compañía doutros profesionais do centro. Tamén penso que as e os docentes teñen nesta metodoloxía colaborativa  unha oportunidade para descubrir as dificultades e os talentos do seu alumnado, co que establecen unha relación máis horizontal que xerárquica.

O alumnado que estuda no IES Miguel Catalán (Coslada, Madrid) síntese orgulloso do seu centro. A fortaleza dese vínculo resulta dunha serie de programas que permiten á rapazada participar en iniciativas que se desenvolven fóra do eido educativo e que lles permiten mellorar algúns aspectos da comunidade mediante relacións de cooperación. Gustoume ver a unha rapaza relatar a súa experiencia coa entrega de libros ás persoas ingresadas no hospital. Non me sorprende que os resultados académicos deste IES superen a media da Comunidade de Madrid tanto  en secundaria como en bacharelato. Cando se substitúe a relación xerárquica habitual dos centros por unha máis horizontal, na que todos aportan de maneira activa, o lóxico é que a rapazada sinta o instituto como algo máis propio. Penso que un dos grandes logros deste tipo de programas, segundo salienta un profesor involucrado, reside en conseguir que o alumnado tome conciencia da súa enorme capacidade para cambiar pequenas cousas. É o único...

  Seguro que tedes escoitado nomes ben raros de cans. Cal é o máis curioso que recordades? Cal credes que é o nome de can máis común? Podedes botarlle unha ollada a esta publicación sobre o tema: Ideas para bautizar ao teu can   Despois desta pequena introdución, propóñovos ler este artigo do diario El Progreso, de Lugo.  Praza de Lenin, s/n, A Pobra de Burón   Para iso, pídovos que repartades un parágrafo para cada un e que despois compartades co resto da clase o contido que vos tocou na vosa parte. Resolveremos en conxunto calquera dúbida sobre o vocabulario. Ao choio! 

Penso que durante demasiado tempo interpretamos o verbo "innovar" como o resultado da aplicación sistemática das novas tecnoloxías na ensinanza. O descoñecemento das ferramentas alimentaba a resistencia a cambiar o modelo tradicional. Porén, se pensamos na innovación como unha actitude coa que procurar solucións que faciliten a aprendizaxe do noso alumnado, disiparemos moitos dos medos a experimentar. No meu caso particular, gustaríame innovar dentro da aula para mellorar a comunicación entre o alumnado e o profesorado, pero tamén entre os integrantes de cada un dos colectivos. Considero que unha correcta comunicación senta o primeiro paso para establecer relacións de respecto.

  Boas! O programa Dígocho eu, guiado pola xornalista Esther Estévez na CRTVG, presenta de maneira divertida os usos normativos do galego e pon de manifesto algúns dos erros máis comúns que cometemos ao falalo.   Postos a encararnos cos bechos peludos, propóñovos este exercicio no que Estévez explica a fala de distintos animais. Escoitade o vídeo e, a continuación, marcade as seguintes frases como verdadeiras ou falsas, pero non vale darlle de novo ao play! Nas falsas, indicade por favor cal sería a forma correcta. 1. Os gatos miúñan.   2. As lobas oubean ou oulean.   3. Os cabalos emiten rinchos.   4. As vacas muxen.   5. Os xabaríns e os cochos roñan e rosman.   6. Os tigres ruxen.   7. As ovellas balan.   8. Os paxaros chían.   9. As pegas e os corvos grañan.   10. As moscas zunen.   Conta cantos acertos tiveches. Cada día, ao terminar a clase sumaremos a puntuación de cada exercicio conxunto. Quen máis puntos xunte poderá ...

  Boas!   Son Lucía e alégrome moito de saudarvos por aquí. Ás veces, achegarse a unha lingua desperta as mesmas sensacións que facelo a un becho peludo, de aí o nome deste blog. Deixarémolo en que o resultado da interacción resulta incerta. Teño a gran sorte de adoptar aquí o rol de intermediaria para que ese encontro sexa o máis parecido posible ao que teriades cunha bolboreta e non cun escornabois. Aínda que os dous son fermosos, son múltiples as circunstancias que nos levan a reaccionar de maneira distinta ante eles. Iso mesmo penso que ocorre na aprendizaxe das diferentes linguas.  Calquera que sexa a vosa motivación e condicionantes, eu estou aquí para axudarvos, así que poñede o casco de exploradora do Decathlon porque iniciamos o camiño polo curso da Escola Oficial de Idiomas de Lugo que culminaredes cun nivel C1 de galego . Asegúrovos que a viaxe será apaixonante! Saúdos!